KIPANDE CHA SATELLITE KILICHODHANIWA KUWA BOMU

Wataalam wa mabomu kutoka jeshi la wananchi wa Tanzania JWTZ wamefika katika eneo la Ruganzo wilayani Ngara Mkoani Kagera ambako kitu kisichofahamika kimeanguka tangu jumatano usiku na kubaini kuwa kitu hicho sio bomu

Mnadhimu mkuu wa mafunzo na utendaji kivita kutoka Briged ya Faru Tabora Kanal Simon Hongoa amesema kuwa kitu hicho kilichoibua hofu kwa wakazi wa eneo hilo na wilaya ya Ngara kwa ujumla sio Bomu bali ni kipande cha Satellite kilichoanguka kutoka angani

Aidha wamekichukua kipande hicho cha Satellite na kukihifadhi katika kambi ya jeshi la Wananchi iliyopo eneo la K-9 wilayani Ngara

Awali kamanda wa polisi mkoa wa Kagera Bw Philip Kalangi alisema kuwa askari waliofika eneo hilo hapo juzi walishindwa kukitambua kitu hicho na kutoa taarifa makao makuu ya jeshi hilo jijini Dar Es Salaam

Kipande hicho cha Satellite chenye urefu wa zaidi ya sentimeta 50, kikiwa na umbo la yai pamoja na nyuzinyuzi kilianguka usiku wa kuamkia jana katika eneo hilo